Torres trúði ekki að Liverpool hefði áhuga

Spænski markahrókurinn Fernando Torres hefur gefið það upp að hann hafi ekki trúað því þegar Rafa Benitez setti sig fyrst í samband við hann með það fyrir augum að fá hann til Liverpool.

Torres hefur slegið í gegn hjá enska liðinu síðan hann var keyptur fyrir yfir 20 milljónir punda frá Atletico Madrid.

Hann var hinsvegar mjög tortrygginn þegar hann fékk símtal frá Rafa Benitez og hélt að um símahrekk væri að ræða. Hann ákvað því að hringja í landa sinn Pepe Reina til að ganga úr skugga um að þetta væri satt.

"Þegar Rafa hringdi fyrst í mig, spurði ég sjálfan mig hvort það gæti verið að þetta væri símahrekkur. Ég ákvað því að hringja í Reina og fá það staðfest hvort númerið væri í raun númerið hans Benitez. Þegar ég fékk það svo staðfest, vissi ég að þetta var símtalið sem ég var búinn að bíða eftir," er haft eftir Torres í The Sun.