Er Robbie Keane að falla á prófinu?

Goðsögnin Ian Rush hjá Liverpool óttast að framherjinn Robbie Keane muni ekki standast þær kröfur sem á hann eru gerðar á Anfield.

Keane hefur aðeins skorað tvö mörk fyrir Liverpool í úrvalsdeildinni síðan hann var keyptur á stórfé frá Tottenham og hefur alls skorað fjögur mörk í nítján leikjum á þeim tæpu fjórum mánuðum sem hann hefur leikið með liðinu.

Ian Rush, sem sjálfur raðaði inn mörkunum fyrir Liverpool á áttunda áratugnum, segist óttast að Keane fari sömu leið og menn eins og Craig Bellamy, Fernando Morientes og Emile Heskey - út um dyrnar á Anfield.

"Robbie Keane er að fá að smakka á því hvað til þarf til að spila fyrir Liverpool. Það er allt annað en að spila fyrir Tottenham - þar sem þér dugar að spila vel í þremur af hverjum sex leikjum. Hjá Liverpool þarftu að spila vel í fimm af hverjum sex leikjum. Það er pressan sem er á Keane núna og hann verður að læra að lifa með því," sagði Rush í samtali við Liverpool Echo.

"Fólk er farið að tala um færin sem hann er að klúðra og það eykur bara á pressuna. Sumir leikmenn ná ekki að höndla þá pressu. Í því sambandi detta mér í hug leikmenn eins og Craig Bellamy, sem var frábær hjá Blackburn en náði sér ekki á strik á Anfield. Fernando Morientes náði aldrei að spila eins vel með Liverpool og með Real Madrid -- og svo Emile Heskey sem er enn í enska landsliðinu en stóðst ekki pressuna á Anfield," sagði Rush.