Spáir helmingslækkun á raunverði íbúða til ársins 2011

Greining Glitnis reiknar með að á þremur árum muni raunverð íbúða lækka um helming á landinu. Er þetta afleiðing fjármálakreppunnar. Þetta kemur fram í nýrri spá greiningarinnar um þróun íbúðaverðs.

Á næsta ári, gerir greiningin ráð fyrir að íbúðaverð lækki um 15% að nafnvirði og um það bil 18% að raunvirði. Mikill þrýstingur verður þá til staðar til verðlækkunar sem leiðir til þess að nafnverð íbúða gefur eftir.

Á þessu ári hefur íbúðarhúsnæði lækkað um tæplega 3% að nafnverði og um tæplega 20% að raunverði. Sú helmingslækkun sem greiningin sér fyrir sér á tímabili kreppunnar er því að stórum hluta komin fram nú þegar.

Spá greiningarinnar nær yfir tímabilið frá því að íbúðaverð náði hámarki um síðustu áramót og fram til ársins 2011.

Auk þeirra neikvæðu áhrifa sem minnkandi kaupmáttur, aukið atvinnuleysi, aukin svartsýni, lítið framboð af lánsfé og samdráttur í hagkerfinu hafa á íbúðamarkaðinn kemur það mikla framboð sem fyrir var á íbúðamarkaði til með að auka verulega á verðþrýsting niður á við.

Verðtrygging húsnæðislána og umfang gengistryggðra lána hér á landi eykur enn á þennan verðþrýsting vegna snaraukinnar greiðslubyrðar þessara lána.

Árið 2010 er spáð að íbúðaverð muni lækka um 10% að nafnvirði og 13% að raunvirði. Umhverfið verður enn erfitt íbúðamarkaðinum enda verður hagkerfið ennþá í heljargreipum kreppunnar.

Greining býst við að íbúðamarkaðurinn byrji að taka við sér á nýjan leik árið 2011 enda verður stormurinn þá líklega genginn yfir að mestu leiti og skilyrði fyrir hagvöxt og stöðugleika ættu að hafa skapast á nýjan leik.

Atvinnuleysi verður þá á undanhaldi, ráðstöfunartekjur byrja að aukast á nýjan leik og aðgengi að lánsfé tekið að batna. Eitt aðaleinkenna íbúðamarkaða í löndum sem lenda í fjármálakreppu er að samdrátturinn á íbúðamarkaði tekur mjög skjótt af.