Framkvæmdastjóri ráðinn til Sense

Erling Ásgeirsson hefur tekið við starfi framkvæmdastjóra Sense ehf., sem er eitt dótturfélaga Nýherja.

Hann var áður framkvæmdastjóri Notendalausna Nýherja og hafði starfað sem framkvæmdastjóri hjá félaginu frá 1992. Erling starfaði áður sem sérfræðingur á tæknideild IBM á Íslandi. Hann er með meistararéttindi í rafeindavirkjun.

Sense er fyrirtæki með stafrænar lausnir, svo sem fyrir hljóð- og myndbúnað. Fyrirtækið rekur ráðgjafa- og hönnunardeild, tækniþjónustu og samnefnda verslun í Hlíðarsmára. Það rekur einnig Sony Setrið í Kringlunni og dreifingarmiðstöð og söludeild í Akralind.

Fyrirtækið er umboðsaðili fyrir Sony, NEC, Panasonic, Crestron stjórnbúnað og annast sölu og dreifingu á þessum vörum ásamt vörum frá Canon, Bose o.fl. til einstaklinga, fyrirtækja og endursöluaðila.

Áætlaðar árstekjur Sense ehf. eru um 2 milljarðar kr. og er fjöldi starfsmanna um 40.