Wenger getur keypt ef hann vill

Peter Hill-Wood, stjórnarformaður Arsenal, segir að Arsene Wenger knattspyrnustjóri fái þá peninga sem hann þarf til leikmannakaupa hjá félaginu.

Arsenal hefur verið gagnrýnt nokkuð fyrir að halda að sér höndum á leikmannamarkaðnum undanfarið og flestir eru á einu máli um að vanti reyndari leikmenn í hópinn í bland við þá ungu og efnilegu sem fyrir eru hjá félaginu.

Hill-Wood segir að Wenger hafi aldrei verið neitað um að kaupa leikmenn og fái þar af leiðandi fjármagn til að versla í janúar ef þurfa þykir.

"Það hefur verið orðrómur um það að við bönnum honum að kaupa leikmenn, en það er af og frá. Wenger er mjög skynsamur þegar kemur að kaupum og lætur hvorki stuðningsmenn né blaðamenn etja sér út í að kaupa hvern sem er. Hann mun aðeins versla ef hann telur viðkomandi leikmann styrkja liðið, en hann fær sannarlega fé til þess," sagði Hill-Wood í samtali við Sky.