Rarik stígur fyrsta skrefið í útrás sinni

Rarik hefur keypt 10,5 prósenta hlut í norska orkufyrirtækinu Blåfells Energi af Landsbankanum. Eftir kaupin á Landsbankinn 17,5 prósenta hlut í fyrirtækinu.

Blåfell Energi er skráð á hlutabréfamarkað í Ósló með eigið fé upp á tæplega 1,7 milljarða íslenskra króna. Finnska orkufyrirtækið Kymopvioima Hydro Oy á helmingshlut í Bláfelli og hið hollenska Koop Duurzame Energi rúmlega tuttugu og tvö prósent.

Rarik er opinbert hlutafélag að fullu í eigu íslenska ríkisins og er fjárfestingin sú fyrsta sem félagið ræðst í utan landsteinanna. Tryggvi Þór Haraldsson, forstjóri Rarik, segir eðlilegt að spurningar vakni um hvort eðlilegt sé að fyrirtæki, sem er að fullu í eigu ríkisins, leggist í fjárfestingar sem þessar. „Þetta eru spurningar sem við höfum spurt okkur í mörg ár. Nú er Rarik orðið að hlutafélagi og stjórn fyrirtækisins taldi að þetta væri leið sem rétt væri að fara.“

Tryggvi telur fjárfestinguna samræmast yfirlýstri stefnu Rarik: að veita sem besta þjónustu með þarfir og óskir viðskiptavina sinna að leiðarljósi „Við teljum að með því að miðla okkar þekkingu og sækja nýja getum við bætt okkar þjónustu.“

Tryggvi játar að stjórn Rarik hugi að frekari útrásarskrefum en segir ekki tímabært að tjá sig frekar eins og mál standa. „Stefna stjórnarinnar er að nýta þá þekkingu sem er í fyrirtækinu, en takmarka hana ekki við heimahagana. Íslendingar eru þekktir fyrir hreina orku og við búum yfir áralangri reynslu og þekkingu sem eðlilegt er að miðla.“

Ætlunin er að Rarik og Landsbankinn komi að gerð 45 vatnsaflsvirkjana í Noregi í gegnum Blåfall Energi og er áætlað að heildarfjárfestingin nemi rúmum 10,8 milljörðum íslenskra króna. Reiknað er með að fjárfestingin geti skilað sextán til tuttugu prósenta ávöxtun á ári „Við förum í þetta verkefni með aðilum sem hafa hagnaðarsjónarmið að leiðarljósi, rétt eins og við,“ segir Tryggvi Þór Haraldsson.

Ætlunin er að skilja útrásarmálin frá hefðbundnum rekstri Rarik og stofna sjálfstætt hlutafélag um erlendar fjárfestingar félagsins.