Brjóstahneyksli hjá Barton

Miðjumaðurinn Joey Barton fær nægan tíma til að semja áramótaheit sín þar sem hann verður í grjótinu fram á fimmtudag. Í gær kom upp enn eitt hneykslið í kring um Barton og drykkjulæti hans.

Breska blaðið Sun hefur þannig undir höndum myndbandsbút þar sem Newcastle-leikmaðurinn sést stinga höfðinu þrívegis í barm amerískrar fegurðardísar á dansgólfi á skemmtistað. Barton var mjög ölvaður að sögn vitna og reyndi ítrekað að fá stúlkuna til að dansa við sig með þessum frumlegu aðferðum.

Breskir miðlar eru farnir að kalla miðjumanninn Bakkus-Barton, en hann var handtekinn fyrir líkamsárás á dögunum og dúsir í fangelsi. Fyrrum leikmaðurinn og glaumgosinn Stan Collymore er þegar búinn að bjóða Barton ráðgjöf eftir að hafa sjálfur lent í flöskuna á sínum tíma og ráðleggur honum að lesa ævisögu sína.