Öflugir erlendir fagfjárfestar keyptu Straumshlutinn

Mikið hefur verið rætt og ritað í dag og í gær um þá ákvörðun fjárfestingabankans Straums/Burðaráss að selja 5,31% eignahlut sinn í bankanum fyrir 10,2 milljarða. Flestum þótti verðið ansi lágt enda bréfin seld á genginu 18,6 sem er með því lægsta sem það hefur verið frá áramótum. Heimildir Vísis herma hins vegar að það hafi þjónað hagsmunum Straumsmanna að selja nú þar sem kaupendurnir eru öflugir erlendir fagfjárfestar sem talið er að muni styrkja bankann verulega þegar til lengri tíma er litið. Ekki skipti máli þótt gengi bréfanna hafi verið með lægsta móti.

Samkvæmt heimildum Vísis fengu Straumsmenn einfaldlega tilboð sem þeir gátu að eigin mati ekki hafnað. Öflugir erlendir fagfjárfestar komu að máli við forsvarsmenn fyrirtæksins og föluðust eftir rúmlega 5% hlut. Bankinn átti sjálfur hlut af slíkri stærðargráðu og ákvað að selja þegar ljóst var að um var að kaupendur sem talið var að myndu styrkja bankann gífurlega þegar til lengri tíma er litið. Heimildir Vísis innan úr Straumi herma að þar á bæ séu menn afar hamingjusamir með söluna og telja að aðkoma erlendu fjárfestanna sé til þess fallin að auka verðmæti bankans gífurlega.

Það hefur ekki verið neitt launungarmál að forsvarsmenn Straums/Burðaráss lhafa engi leitað að erlendum fjárfestum í hlutahafahóp fyrirtækisins. Margar aðgerðir þess eins og til dæmis að byrja að færa bókhald og eigið fé í evrum í desember á síðasta ári, það að aðalfundur nú í vor heimilaði stjórn Straums að vinna að því að færa hlutabréf fyrirtæksins í evrum og að fjölmargir erlendir lykilstarfsmenn, með forstjórann William Fall í fararbroddi, hafa gengið til liðs við fyrirtækið að undanförnu, hafa fært heim sanninn fyrir því að fyrirtækinu er mikið í mun að gera það aðlandi fyrir erlenda fjárfesta.