Einkaneysla eykst áfram

Sú mikla veltuaukning sem varð í dagvöruverslun í mars síðastliðnum, þegar virðisaukaskattur var lækkaður og vörugjöld afnumin, hefur haldið áfram að aukast hvern mánuð og einkaneysla heldur áfram.

Samkvæmt nýjum tölum frá Rannsóknarsetri verslunarinnar jókst veltan um rúm fjögur prósent milli júní og júlí en ef júlímánuður er borinn saman við sama mánuð í fyrra jókst veltan í dagvöruverslunum, sem selja mat og drykk, um rúm tíu prósent. Á sama tímabili lækkaði verð á dagvöru um þrjú prósent.

Fram kemur í tölum Rannsóknarsetursins að sala áfengis hafi tekið mikinn kipp í sumar og var hún nærri sjö prósentum meiri í júlí í ár en í sama mánuði í fyrr miðað við fast verðlag. Aukin sala á mat og drykk í sumar er meðal annars rakin til veðurblíðunnar en einnig er bent á í tilkynningu Rannsóknarsetursins að ferðamönnum hafi fjölgað um 19 prósent það sem af er ári og það hafi einnig áhrif á sölu matar og drykkja.

„Í júlímánuði er áætlað að um 78.500 erlendir ferðamenn hafi komið til landsins og ætla má að þeir hafi samtals varið næstum tveimur milljörðum kr. til kaupa á mat og drykk í verslunum og á veitingahúsum þann mánuð. Auk þess má ætla að þessir ferðamenn hafi varið um 824 millj. kr. til kaupa á öðrum vörum í íslenskum verslunum, ef miðað er við skoðanakönnun Ferðamálastofu á hlutfallslegri dreifingu útgjalda erlendra ferðamanna á Íslandi," segir í tilkynningu Rannsóknarseturs verslunarinnar.

Enn fremur er bent á að greiðslukortavelta sýni að einkaneysla landsmanna haldi áfram að aukast, en innlend greiðslukortavelta jókst um nærri tíu prósent á tímabilinu janúar til júní síðastliðinn, samanborið við sama tímabil í fyrra.