Viðræður um sameiningu sparisjóða

BYR-sparisjóður og Sparisjóður Norðlendinga ræða nú mögulega sameiningu sjóðanna. Markmiðið er að styrkja stöðu sparisjóðanna í harðnandi samkeppni á fjármálamarkaði til hagsbóta fyrir viðskiptavini, starfsfólk og stofnfjáreigendur. Stjórnarformenn sparisjóðanna stýra viðræðunum samkvæmt umboði frá stjórnum þeirra.

Í fréttatilkynningu sem send var fjölmiðlum í dag segir að viðræður um sameiningu sparisjóðanna séu viðbrögð við örum vexti fjármálafyrirtækja. Í mögulegu sameiningarferli sé stefnt að því að miða skiptahlutföll við sex mánaða uppgjör sjóðanna sem birt verði í lok ágúst. Verði niðurstaða viðræðnanna jákvæð yrði sameining háð samþykki stofnfjáreigenda beggja sjóðanna, Fjármálaeftirlitsins og Samkeppniseftirlitsins. Engin tímamörk hafi verið sett fyrir viðræðurnar en stefnt sé að því að sameining komi í kjölfar sameiningar Byrs og Sparisjóðs Kópavogs.