Kaupir viðbitsfyrirtæki

Alfesca hefur náð samningum um yfirtöku á franska matvæla­fyrirtækinu Le Traiteur Grec, sem framleiðir viðbit úr grænmeti fyrir stórmarkaði í Frakklandi. Kaupverð nemur 19,7 milljónum evra, jafnvirði 1.669 milljóna íslenskra króna. Greitt verður með reiðufé en gert er ráð fyrir því að kaupin gangi í gegn í næsta mánuði að lokinni endurfjármögnun félagsins.

Le Traiteur Grec var stofnað árið 1987 og er það nú leiðandi á frönskum smuráleggsmarkaði. Fyrirtækið hefur tuttugu prósenta hlutdeild með smurálegg, þriggja prósenta hlutdeild með smábrauð og jafn stóra hlutdeild á markaði fyrir grænmetisídýfur.

Í tilkynningu frá Alfesca kemur fram að velta Le Traiteur Grec, sem var stofnað árið 1987, hafi numið tólf milljónum evra, jafnvirði rétt rúmum einum milljarði króna, á síðasta ári. Það er rúmlega tíu prósenta aukning frá árinu á undan.

Þá námu eignir félagsins í lok síðasta árs 6,3 milljónum evra, 533,8 milljónum króna, og var félagið skuldlaust.

Haft er eftir Xavier Govare, forstjóra Alfesca, að Le Traiteur Grec falli vel að starfsemi fyrirtækisins og muni styrkja stöðu Alfesca á markaði með smurálegg.