TM Software semur við norsku sjúkrahúsapótekin

Íslenska tæknifyrirtækið TM Software og norsku sjúkrahúsapótekin ANS hafa undirritað samning um þróun hugbúnaðar fyrir rafræna lyfjaumsýslu. Þetta er sagður stærsti samningur íslensks fyrirtækis á sviði heilbrigðisupplýsingatækni.

TM Software varð fyrir valinu eftir alþjóðlegt útboð sem sjúkrahúsapótekin stóðu fyrir og segir í tilkynningu frá TM Softvare að sérfræðiþekking en ekki lægsta tilboð hafi ráðið úrslitum.

Með hugbúnaði TM Software geta læknar skráð lyfseðla í rafrænt lyfjafyrirmælaforrit og fer þá seðilinn til apóteksins. Þar fer lyfjafræðingur yfir seðilinn og sendir síðan áfram á sérhæft skömmtunarvélmenni sem tínir til lyf sjúklings, pakkar þeim og strikamerkir.

Lyfjunum er síðan komið til hjúkrunarfræðinga með rörpósti upp á deild eða með vélmennum sem sendast með lyf sem þurfa sérstaka meðhöndlun. Að lokum gefur hjúkrunarfræðingur sjúklingi lyfið en sértækt strikamerki á lyfjaskammtinum tryggir að rétt lyf sé gefið réttum einstaklingi á réttum tíma.

Í tilkynningu frá TM Software segir að þessi lausn sé fullkomnasta lyfaumsýslukerfi sem þekkist og sé gríðarlegur hagur jafnt fyrir þá sem þiggja heilbrigðisþjónustuna og þá sem veita hana.