Óttast að kínverskt efnahagslíf ofhitni

Hagvöxtur í Kína jókst um rúmlega 11 prósent á fyrstu þremur mánuðum ársins og hafa vangaveltur aukist um það hvort hagkerfið þar í landi sé að ofhitna.

Þessi mikli hagvöxtur hefur vakið nokkurn óróa á mörkuðum enda er talið að hækka þurfi stýrivexti í landinu til þess að hægja á vaxandi verðbólgu í Kína. Hún mældist 3,3 prósent í mars og telja sérfræðingar á markaði að yfirvöld muni grípa til einhverra aðgerða til að hægja á vextinum í þessu fjölmennasta landi heims.

Hagvöxtur í Kína hefur aukist um meira en tíu prósent síðustu fjögur ár en það má meðal annars rekja til mikill fjárfestinga ríkisins, aukins útflutnings og fjárfestinga erlendra aðila. Hins vegar er bent á í frétt á vef BBC að vöxturinn hafi sínar neikvæðu afleiðingar því óvíðar megi finna meiri mengun í borgum en í Kína. Þá óttist markaðsaðilar að kínverskt efnhagslífs sé á svo mikilli ferð að það geti ofhitnað en slíkt gæti haft áhrif á markaði víða um heim.