Sextán útskriftir úr einu námi?

Skóli 365-miðla í samvinnu við Háskólann í Reykjavík-Símennt útskrifaði í síðustu viku nemendur úr hagnýtu námskeiði í fjölmiðlun sem fjallaði um undirstöðuatriði fréttamennsku en áður hafði sami skóli útskrifað hóp nemenda af námskeiði í rannsóknarblaðamennsku.

Því miður er fáum kunnugt að Háskóli Íslands hefur frá árinu 2005 boðið uppá tveggja ára meistaranám í blaða- og fréttamennsku sem er bæði hagnýtt og fræðilegt.

Margt færasta fjölmiðlafólk landsins hefur komið að hagnýtum hluta námsins. Þar má nefna Þór Jónsson, Þorfinn Ómarsson, Sigmund Erni Rúnarsson, Ólaf Þ. Stephensen, Önnu Kristínu Jónsdóttur, Boga Ágústsson, Sigrúni Stefánsdóttur, Ómar Ragnarsson, Þorstein J. Vilhjálmsson, Örnu Schram og fleiri.

Í fræðilegum hluta námsins njóta nemendur handleiðslu Þorbjarnar Broddasonar sem er einn virtasti prófessor heims á sínu fræðasviði. Fjölmargar ritrýndar greinar eftir hann hafa birst í öllum helstu fræðiritum um fjölmiðlun, m.a. birtist grein eftir hann í 20 ára úrvalsriti European Journal of Communication.

Meðal námskeiða í MA-náminu í HÍ eru fréttamennska, vinnubrögð og siðareglur blaðamanna, málfar og stíll, skapandi textar og viðtalstækni, sjálfbær fréttamennska net og nýmiðlun, fjölmiðlun og leikreglur samfélagsins, máttur boðskiptanna og alþjóðasamvinna og staða Íslands í alþjóðakerfinu, sjónvarpsþættir og heimildarmyndir, almannatengsl, útvarp og þáttagerð. Í námskeiðinu dagblöð og tímarit var sérstaklega fjallað um rannsóknarblaðamennsku.

Þótt námið í HÍ eigi sér stutta sögu hafa nemendur þaðan haslað sér völl í fréttum og Kastljósi Sjónvarpsins, Stöð 2, Fréttablaðinu, Morgunblaðinu, Rúv, útgáfufélaginu Birtingi og fleiri miðlum.

Metnaður þátttakenda og stjórnanda námskeiða 365 skólans er bersýnilega mikill og er það vel. Ég velti því hins vegar fyrir mér hvort það sé raunhæft fyrir Háskóla Íslands að útskrifa nemendur frá skólanum í hvert sinn sem þeir ljúka einstökum námskeiðum.

Höfundur er MA í blaða- og fréttamennsku frá Háskóla Íslands.