Gott mótvægi við fjármálafyrirtækin

Skráning Century Aluminum í Kauphöll Íslands er tímamótaskráning að mati Þórðar Friðjónssonar, forstjóra Kauphallar Íslands. Fordæmi þess að fá bandarískt félag inn á íslenska markaðinn megi nota til að laða önnur félög utan Evrópusambandsins að íslenska markaðnum. Það gildi þó fyrst og fremst ef allt gengur að óskum og viðskipti með félagið verði lífleg.

Skráning Century hefur átt sér nokkurra mánaða aðdraganda.

Fyrsti fundur Þórðar með Century-mönnum átti sér stað snemma þessa árs. Síðan hefur mikil vinna verið lögð í skráningu félagsins. Hún er einnig brautryðjendaskráning að því leyti að ekkert bandarískt félag hefur áður farið út í tvíhliða skráningu þar vestra og í Evrópu frá því að nýtt regluverk Evrópusambandsins tók gildi. Þetta regluverk er að taka gildi í Evrópu og verður tekið upp hér í haust. Þetta segir Þórður hafa flækt málin. „Á meðan er verið að vinna að nýjum málum liggja hlutirnir ekki eins ljóst fyrir og þeir gera eftir á. Lausnirnar eru ekki eins augljósar. Þess vegna komu tímapunktar í ferlinu þar sem menn fórnuðu höndum og spurðu sjálfa sig hvað í ósköpunum þeir væru komnir út í. En svo einbeittum við okkur að því að leysa málin.“

Þórður á von á að íslenskir fjárfestar taki Century vel á markaði, eins og þeir gerðu í nýafstöðnu hlutafjárútboði. „Century á mikið erindi inn á íslenska markaðinn. Það er gott að fá fyrirtæki inn sem er annars eðlis en fjármálafyrirtækin, sem eru langstærst og orðin dálítið ráðandi á markaðnum núna.“

Hann segir félagið þó eiga möguleika á meiri veltu á aðalamarkaðnum heldur en á First North og góðar líkur séu á að þar verði það skráð innan tíðar. Engu að síður fari First North markaðurinn hratt vaxandi. Heildarmarkaðsvirði skráðra félaga á markaðnum sé um fjórir milljarðar evra. Hann sé nú orðinn stærsti hliðarmarkaður í Evrópu. Hann ætti því að tryggja að Century verði vel sýnilegt, bæði á Íslandi og annars staðar í Evrópu.