Montgomerie komst ekki áfram á Opna skoska

Frakkinn Gregory Havret og Spánverjinn Jose Manuel Lara voru með forystu eftir 36 holur á samtals 10 höggum undir pari. Havret lék á 64 höggum í gær og Lara á 65 höggum. Phil Mickelson er einu höggi á eftir, en hann lék á 68 höggum í gær. Ernie Els er á samtals 7 höggum undir pari og Sergio Garcia á 6 höggum undir pari.

Þetta mót er síðasti möguleikinn fyrir Havret að spila á risamóti á þessu ári, sem hann hefur aldrei gert áður, því að sá keppandi sem endar efstur af þeim leikmönnum sem ekki eru þegar búnir að tryggja sér rétt að spila í risamóti og er einnig í einu af tíu efstu sætunum í mótinu fær þáttökurétt á Opna breska meistaramótinu sem hefst í næstu viku. Havret var einu höggi frá því að komast inn á Opna bandaríska mótið og svo endaði hann illa í síðasta móti sem gefur einnig sæti á Opna breska.

Havret hefur verið að spila mjög vel að undanförnu og segir hann að ein af ástæðunum sé að hann skipti um pútter ekki alls fyrir löngu. Hann sá svokallaðan magapútter og ákvað að prófa hann og hefur það gengið mjög vel síðan að pútta.

Lara er hins vegar að koma tilbaka eftir að hafa meiðst illa á hæl fyrir rúmlega ári síðan. Hann gat ekkert spilað golf og reyndu sérfræðingar alls kyns aðferðir til að gera hann betri en það var ekki fyrr en hann fór í nálarstunguaðferð hjá sérfræðingi frá Kóreu að hann fór að skána. Hann getur ekki farið út að hlaupa en hann getur gengið og slegið golfbolta. Hann stefnir á sigur í mótinu sem tryggir honum sæti á stærsta og virðulegasta mótinu, Opna breska Meistaramótinu.

Kylfingur.is