Tæpir 8 milljarðar í hús

Straumur-Burðarás Fjárfestingarbanki skilaði 7,7 milljarða króna hagnaði á öðrum ársfjórðungi. Það var lítillega undir spám greiningardeilda bankanna sem vanmátu kostnað vegna fyrirtækjakaupa á fjórðungnum.

Hagnaður Straums-Burðaráss fjárfestingarbanka nam 94,19 milljónum evra á öðrum ársfjórðungi. Það jafngildir um 7,7 milljörðum íslenskra króna. Til samanburðar var hagnaðurinn 69,16 milljónir evra á fyrsta fjórðungi þessa árs. William Fall, forstjóri Straums-Burðaráss, segir bankann hafa aukið verulega við fjölbreytni í rekstri sínum. Unnið sé að því að fá dreifðari tekjur inn í reksturinn, auka eigi hlutdeild vaxta- og þóknanatekna og draga frekar úr stöðutökum í hlutabréfum. Þetta gerir hann ráð fyrir að minnki verulega þær sveiflur sem verið hafa í afkomu bankans.

Hagnaður fjórðungsins var nokkuð lægri en greiningardeildir bankanna höfðu gert ráð fyrir. Meðaltalsspá þeirra hljóðaði upp á rúmlega hundrað milljóna evra hagnað. Tekjur voru í samræmi við spár en munurinn stafaði af hærri kostnaði en gert var ráð fyrir. Hann kom að mestu til vegna einskiptiskostnaðar sem til féll á ársfjórðungnum.

Mikinn vöxt er að merkja á flestum sviðum Straums. Hreinar rekstrartekjur fjórðungsins námu 148,20 milljónum evra, samanborið við 92,51 milljón evra á fyrsta fjórðungi ársins. Heildareignir jukust um 1,64 milljarða evra og námu 6,8 milljörðum þann 30. júní. Heildarútlán jukust um 266 milljónir evra. Þá hefur starfsmannafjöldi bankans tífaldast á síðustu átján mánuðum. William Fall segist ekki gera ráð fyrir eins hröðum vexti það sem eftir er af árinu eins og á fyrri helmingnum. Áherslan verði nú heldur á samþættingu þeirra félaga sem keypt voru fyrr á árinu, eQ og Wood&Company. „Straumur er þó í þeirri sérstöku stöðu að eiga of mikið fjármagn úr að spila. Eiginfjárstaða hans er mjög rúm. Ef gott tækifæri kemur til spilanna, eitthvað sem vit er í á góðu verði, munum við að sjálfsögðu líta á það. Það er hins vegar ekkert í pípunum eins og er.“

Fall hefur nú vermt forstjórastól Straums í sjö vikur. Hann hefur gefið út að eftir níutíu daga í starfi verði ný stefna og framtíðarsýn bankans kynnt. „Straumur hefur náð langflestum þeim markmiðum sem voru sett fyrir átján mánuðum. Nú er kominn tími til að innleiða ný markmið, ekki einungis fjárhagsleg heldur einnig um aukið gagnsæi til hluthafa og bætta þjónustu. Við ætlum að verða leiðandi fjárfestingarbanki í Norður- og Mið-Evrópu. Þetta eru nauðsynleg skref til þess.“