Hafnarfjörður – stærsti álbræðslubær í Evrópu?

Jón Ólafsson, kennari í Hafnarfirðí skrifar.

Verði álbræðslan í Straumsvík stækkuð þrefalt eins og fyrirhugað er, verður Hafnarfjörður stærsti álbræðslubær í Evrópu. Er það framtíðarsýnin sem við viljum fyrir bæinn okkar?

Fyrirhugaðar kosningar 31. mars eru gríðarlega mikilvægar fyrir framtíð Hafnarfjarðar næstu 60 árin, sem er áætlaður líftími nýrrar álbræðslu.

Við erum svo lánsöm að búa í einu fallegasta umhverfi bæjar á landinu. Því er ábyrgð okkar mikil. Viljum við áfram búa við fjölbreytt atvinnulíf eða viljum við að álbræðslufyrirtæki, fyrirtæki sem ganga kaupum og sölum í heiminum í dag, verði ráðandi vinnuveitandi í bænum?

Viljum við bæ þar sem kannski verður ekki þorandi að láta ung börn sofa úti í vögnum í hverfum sem eru næst álbræðslunni? Þetta á ekki aðeins við um Vellina, heldur líka framtíðarbyggingarland bæjarins sunnan við álbræðsluna.

Fasteignasalar, ekki aðeins í Hafnarfirði, halda því fram að íbúðakaupendur haldi að sér höndum fram yfir 31. mars með að ákveða hvort kaupa skuli íbúð í Hafnarfirði, og það ekki aðeins á Völlunum, heldur hvar sem er í bænum. Með stækkun álbræðslunnar verður Hafnarfjörður ekki lengur fýsilegur bær til þess að flytja til. Viljum við ekki fjölgun íbúa í bænum og þar með auknar skatttekjur, sem notaðar yrðu til þess að byggja upp bætta þjónustu við íbúana?

Viljum við búa í álbræðslubæ þar sem íbúðarverð verður lægra en annars staðar á höfuðborgarsvæðinu?

Viljum við bæ sem laðar ekki lengur til sín ferðamenn, en mikil aukning hefur orðið á komu þeirra til bæjarins og þjónusta og uppbygging fyrir ferðamenn aukist mjög á undanförnum árum? Óþrjótandi möguleikar eru til aukinnar fjölbreytni á þessu sviði sem ævintýralegt umhverfi bæjarins býður upp á.

Valið stendur ekki á milli þess að tína fjallagrös á sauðskinnsskóm til þess að lifa af, eða vinna í álbræðslu. Möguleikarnir eru óendanlegir og atvinnuástand er með því besta á landinu.

Hafnfirðingar! Stöndum vörð um bæinn okkar - látum ekki mengandi álbræðslu skemma lífsgæði og framtíðarmöguleika okkar.