Airbus veitir afslátt

Evrópski flugvélaframleiðandinn Airbus hefur ákveðið að veita taílenska flugfélaginu Thai Airways afslátt af átta A330 farþegaþotum frá Airbus. Ástæðan er tafir á afhendingu A380 risaþotnanna, sem er tveimur árum á eftir áætlun. Thai Airways hafði pantað sex risaþotur frá Airbus en hótaði að draga kaupin til baka ef flugvélaframleiðandinn veitti flugfélaginu ekki afslátt.

Flugfélagið átti upphaflega að fá risaþoturnar afhentar eftir tvö ár en allt stefnir nú í að af því verði ekki fyrr en árið 2011.

Tafir á afhendingu A380 risaþotnanna hafa sett Airbus í talsverðan vanda. Nokkur flugfélög hafa hótað að hætta við kaup á risaþotunum. Þá hafa nokkur flugfélög dregið kaup á þotunum til baka. Þar á meðal er bandaríska þjónustufyrirtækið FedEx.

Afsláttur flugfélagsins nemur tíu milljónum bandaríkjadala, jafnvirði 683,4 milljóna íslenskra króna, fyrir hverja vél. Ein farþegaþota af gerðinni A330 kostar þá Thai Airways, að afslættinum meðtöldum, um 90 milljónir Bandaríkjadala, rúman 6,1 milljarð íslenskra króna.

Stjórn Airbus ætlar að kynna viðamikla hagræðingu í rekstri fyrirtækisins í næstu viku. Gert er ráð fyrir að fyrirtækið segi upp allt að 57.000 starfsmönnum í Frakklandi, Þýskalandi og Bretlandi.