Ögurstund

Við Íslendingar erum lánsöm þjóð. Við búum á fallegri eyju og eigum nóg af öllu. Okkur líður oftast vel og erum sögð vera bjartsýn og hamingjusöm. Við erum frjáls og heilbrigð og svo lánsöm að mega kjósa okkur fulltrúa á þing þar sem allar stærstu ákvarðanir um framtíð okkar eru teknar.

Það skiptir öllu máli hverja við veljum til þeirra verka. Við erum ekki að kjósa til þess að staðfesta það að við höldum með rétta liðinu og velja okkur sigurvegara sem við skálum fyrir. Við kjósum þá sem við treystum best til þess að vera fulltrúar lífsgilda okkar og þess sem við óskum okkur í framtíðinni.

Ég trúi því að á Íslandi sé hægt að búa um ókomna framtíð í sátt við umhverfið. Að tækifærin liggi í landinu og okkur sjálfum, menningu okkar og arfleifð. Tækifærin eru óendanleg. Ég trúi því að til þess að lifa hér góðu lífi þurfum við ekki að skaða náttúruperlur okkar með því að treysta á nýtingu orkuauðlinda fyrir stórar verksmiðjur.

Við kjósendur höfum nú tækifæri sem aldrei fyrr að velja okkur framtíð. Við höfum um tvennt að velja: að halda áfram að horfa á landið okkar fá flýtimeðferð í eyðileggingu eða framtíð þar sem ákvarðanir eru teknar af yfirvegun og bjartsýni. Ef við veljum fyrri kostinn fáum við ekki annað tækifæri.

Góðir landar, kjósum fólkið í Íslandshreyfingunni á þing.

Alda Sigurðardóttir

Framkvæmdastjóri á Selfossi