Vilja aldurinn úr sjötugu í 67 ár

Samtök verslunar og þjónustu fagna því að atvinnutekjur skerði ekki lengur bætur þeirra sem eru 70 ára og eldri. Í fréttabréfi sínu hvetja samtökin jafnframt ríkisstjórnina til að lækka aldurinn niður í 67 ár hið fyrsta.

„Í landinu er sífellt stærri hópur eldri borgara sem vill og getur unnið margvísleg störf í mismunandi starfshlutfalli, en fæst ekki út á vinnumarkaðinn vegna þess að með launuðu starfi skerðast aldurstengdar greiðslur hans. Á sama tíma eykst heilbrigði hópsins, lífaldur lengist og sífellt fleiri eru tilbúnir að stunda einhverja launavinnu. Þessi staða er uppi, ekki vegna þess að hinar aldurstengdu bætur séu svo háar að með launavinnu en án bótanna geti viðkomandi ekki framfleytt sér, heldur vegna þess að fólki finnst óréttlátt að þær skerðist, - bætur sem það hefur á langri starfsævi áunnið sér rétt til að fá við tiltekinn aldur,“ segir í fréttabréfi SVÞ. „Þetta snýst því um grundvallarafstöðu. Til viðbótar verður svo að nefna þann félagslega ávinning sem hefst af aukinni atvinnuþátttöku eldri borgara sem annars skortir ef til vill lífsfyllingu og tilgang.“

SVÞ fagna áfanganum en benda á að samkvæmt niðurstöðum rannsóknar Rannsóknarseturs verslunarinnar á atvinnuþátttöku eldri borgara og öryrkja gætu um 29 prósent fólks á aldrinum 65 til 71 árs hugsað sér að vinna launavinnu ef tekjurnar skertu ekki lífeyri eða aðrar bætur þeirra. „Þessi hópur er tæplega 4.000 manns. SVÞ hvetja ríkisstjórnina til að ganga enn lengra en nú hefur verið gert með því að aldurstengdar bætur fólks sem náð hefur 67 ára aldri skerðist ekki þótt viðkomandi séu í launuðu starfi. Sömuleiðis bætur öryrkja sem hefja launaða atvinnu.“