Dómsmálaráðherra vill að Valgerður skýri ummæli sín

Dómsmálaráðherra vill að Valgerður Sverrisdóttir, fyrrverandi ráðherra og varaformaður Framsóknarflokksins, skýri ummæli sín um Baugsmálið betur. Valgerður sagði í blaðaviðtali að hún hefði upplifað hvernig sjálfstæðismenn töluðu um Baugsmenn og rannsaka þyrfti upphaf og tilurð málsins.

Viðtalið við Valgerði birtist í Viðskiptablaðinu síðastliðinn föstudag. Þar segir Valgerður mikilvægt að allir séu jafnir fyrir lögum og nú þegar sýnist sem svo að Jón Ásgeir verði jafnvel sýknaður í málinu þá hljóti dómsmálayfirvöld að rannsaka málið og upphaf þess. Hvert upphafið var og hvernig það varð til. Hún hafi sjálf upplifað hvernig sjálfstæðismenn töluðu um Baugsmenn en hátt hafi verið reitt til höggs í málinu. Valgerður vildi þó ekki útskýra um hvaða sjálfstæðismenn hún var að tala um eða hvað þeir hafi verið að segja.

Björn Bjarnason, dómsmálaráðherra, furðar sig á ummælum Valgerðar og segist sjálfur ekki hafa rætt Baugsmenn í hennar návist. Dómsmálaráðherra segir þörf á að Valgerður skýri ummæli sín.