Traustur leiðtogi

Það fór ekki fram hjá neinum, hvorki stuðningsmönnum Samfylkingarinnar eða hvað þá heldur andstæðingum hennar, að með glæsilegu kjöri Ingibjargar Sólrúnar Gísladóttur til formanns Samfylkingarinnar var kominn kvenskörungur með mikla reynslu og stjórnunarhæfileika í hóp stjórnmálaforingja á Íslandi.

Ég vil taka það fram að ég er mjög hreykinn af því að hafa átt þátt í þeirri kosningu ekki síður en þeim góðu minningum frá kosningabaráttu Vigdísar Finnbogadóttur á sínum tíma og glæsilegum sigri hennar í forsetakosningunum þá.

Það hefur hins vegar ekki dulist neinum sem fylgst hafa með stjórnmálum undanfarna mánuði að andstæðingar okkar óttast ekkert meira en konuna í brúnni og kannski ekki að ástæðulausu. Þeir hafa notað öll tækifæri sem hugnast getur til að gera málflutning hennar tortryggilegan í augum almennings.

Þar má einu gilda hvort rætt er um okurvexti, matvælaverð, skuldasöfnun heimilanna eða landbúnaðarmál, svo fátt eitt sé nefnt. Mér hefur reyndar stundum dottið í hug að undanförnu hvort að á Íslandi sé skipulagður karlrembuhópur sem leggi sig allan fram við að koma í veg fyrir pólitískan frama hjá konum, sama í hvaða flokki þær sækja fram. Nýjustu dæmin eru Siv Friðleifsdóttir, Jónína Bjartmarz og Margrét Sverrisdóttir. Þar sem Ingibjörg Sólrún náði markmiði sínu beinast nú öll spót að henni og ganga sumir þar býsna langt.

Það er áhyggjuefni ef við félagar hennar í Samfylkingunni teljum að hún eigi ein að sjá um alla kosningabaráttuna en aðrir Samfylkingarfélagar geti bara slappað af og beðið eftir kosningunum 12. maí n.k. Það er von mín að þessar áhyggjur mínar séu ekki á rökum reistar. Við þurfum margar barátturæður eins og gamli karlinn úr brúnni, Jón Baldvin Hannibalsson, þrumaði yfir okkur sem sóttu kjördæmisþing Samfylkingarinnar í Norðvesturkjördæmi er haldið var að Reykjum í Hrútafirði skömmu fyrir jól.

Að lokum vil ég skora á alla sem aðhyllast félagshyggju og jöfnuð að bretta upp ermar og fara að vinna ötulega að glæstum sigri Samfylkingarinnar 12. maí n.k. Baráttukveðjur, X-S.

Höfundur er verkamaður og formaður Samfylkingarfélagsins í A-Húnavatnssýslu.