Sölunni lokið á AAT

Hf. Eimskipafélag Íslands hefur selt 49 prósenta hlut félagsins í Avion Aircraft Trading (AAT) á 28 milljónir Bandaríkjadala, eða sem nemur tæplega 1,8 milljörðum króna.

Kaupandi er Arctic Partners ehf. sem er í eigu Hafþórs Hafsteinssonar, stjórnarformanns AAT, Arngríms Jóhannssonar, stjórnarmanns og annarra stjórnenda. Arctic Partners keypti 51 prósents hlut í AAT af Eimskipi í október í fyrra. Fram að þeim tíma var félagið að fullu í eigu Eimskips.

Hafþór Hafsteinsson, starfandi stjórnarformaður Avion Aircraft Trading, segir samstarfið við Eimskip síðustu misseri hafa verið mjög ánægjulegt en nú hafi verið rétti tímapunkturinn til að kaupa félagið í heild. „Við erum að vinna í spennandi verkefnum og horfum fram á góð tækifæri sem styðja við kaupin.“

Í tilkynningu Eimskips kemur fram að söluhagnaður félagsins af 49 prósenta hlutnum nemi um 24 milljónum Bandaríkjadala, en það eru rúmlega 1,5 milljarðar króna. Salan verður færð á þriðja ársfjórðung og andvirðið notað til að greiða niður skuldir Eimskips sem til eru komnar vegna mikilla fjárfestinga í fyrirtækjum á sviði kæli- og frystigeymsla.

Salan á AAT er í samræmi við stefnu Eimskips um að selja frá félaginu flugrekstrartengdar eignir. Baldur Guðnason, forstjóri Eimskips, segir mikilvægt fyrir félagið að einbeita sér að kjarnastarfsemi sinni sem sé í flutningum og geymslu á kæli- og frystivörum. „Við erum að byggja hana upp og höfum nú þegar leiðandi stöðu á því sviði á heimsvísu.“