Tek öllu með fyrirvara á afmælisdaginn

„Ég hef engar áhyggjur af því að húsið fyllist af fólki í tilefni dagsins því það trúir enginn að ég eigi afmæli,“ segir Sigurgeir Skúlason landfræðingur sem á stórafmæli í dag, 1. apríl. „Ég er fimmtugur, það víst. Allavega segir mamma það,“ segir Sigurgeir og bætir við að hann hafi gaman af því að eiga afmæli á þessum degi.

„Í seinni tíð hef ég haft gaman af þessu en sem krakki var þetta ekki eins gaman því þá var ég reglulega plataður á afmælisdaginn. Nú er það ég sem plata aðra,“ segir Sigurgeir hress í bragði.

Aðspurður um sögur tengdum aprílgöbbum sem hann hefur orðið fyrir segir hann af mörgu að taka. „Ég var alinn upp í sveit og oft var ég plataður til þess að hlaupa upp í fjárhús þar sem mér hafði verið sagt að kindin mín væri borin. Oftast var þetta eitthvað í tengslum við sveitina og fyrir vikið tók ég öllu með fyrirvara á þessum degi. Sama hvað ég heyrði.“

Í dag hefur Sigurgeir snúið vörn í sókn og platar sjálfur á afmælisdaginn sinn. Hann vill þó ekki taka undir að hann sé stríðinn. „Ekki að mínu mati en börnin mín eru örugglega ósammála mér. Þau segja að ég sé alltaf að plata þau eitthvað, kannski af því að ég fæddist á þessum degi.“

Sigurgeir ætlar að eyða afmælisdeginum í að horfa á son sinn keppa í körfubolta með Fjölni. „Ég ætla að njóta þess að horfa á hann keppa á Íslandsmótinu yfir helgina. Dóttir mín er einnig að keppa en því miður næ ég ekki að horfa á hana líka. Ég hugsa að ég geri lítið annað yfir helgina enda miklu skemmtilegra að horfa á börnin keppa en halda einhverjar veislu. Svo er alltaf möguleiki á að konan eldi góðan mat í tilefni dagsins.“