VBS fjárfestingarbanki hagnast um rúman einn milljarð króna

Hagnaður VBS fjárfestingarbanka á fyrri hluta þessa árs nam rúmum einum milljarði króna eftir skatta samkvæmt milliuppgjöri bankans. Framkvæmdastjóri bankans segir bankann hafa náð viðsnúningi í vaxtatekjum og aukið verulega tekjur af miðlun verðbréfa.

Samkvæmt milliuppgjöri bankans nam hagnaður eftir skatta rúmum 1,1 milljarði króna. Jafngildir það 39 prósent ávöxtun eigin fjár á ársgrundvelli. Fyrir skatta nam hagnaðurinn rúmum 1,3 milljörðum króna sem jafngildir 48 prósent ávöxtun eigin fjár á ári. Fram kemur í tilkynningu frá bankanum að frá samruna VBS og FSP um síðustu áramót hafi hagnaður numið 10 milljónum á hverjum virkum degi.

Hreinar rekstrartekjur námu tæpum 1,8 milljarði króna og eignir í lok tímabilsins voru 23,6 milljarðar.

Haft er eftir Jóni Þórissyni, framkvæmdastjóra bankans, að árangurinn hafi verið framar björtustu vonum. Hann segir sameiningu bankanna hafa heppnast fullkomlega og verkefnastöðu á öllum afkomusviðum mjög góða. Þá segir hann bankann hafa unnið markvisst að því að auka fjölbreytni í starfseminni og því sé viðsnúningur í vaxtatekjum, uppbygging lánasafns og auknar tekjur af miðlun verðbréfa sérstaklega ánægjulegt.