Hagvöxtur vestanhafs undir væntingum

Hagvöxtur jókst um 0,6 prósent í Bandaríkjunum á fyrstu þremur mánuðum ársins, samkvæmt tölum sem bandaríska viðskiptaráðuneytið birti á fimmtudag. Hagvöxturinn hefur ekki verið minni á þriggja mánaða tímabili í rúm fjögur ár.

Niðurstaðan er talsvert undir væntingum greinenda enda hafði verið gert ráð fyrir vexti upp á 0,8 til 1,3 prósent á tímabilinu. Einkaneysla jókst á sama tíma um 4,4 prósent á milli ára.

Verðlækkanir á fasteignamarkaði á fjórðungnum eiga stóran þátt í samdrættinum. Fasteignaverð lækkaði almennt um 1,4 prósent í Bandaríkjunum á fyrstu þremur mánuðum ársins miðað við sama tíma í fyrra, auk þess sem minna var byggt á tímabilinu. Inn í spilar mikill samdráttur á fasteignalánamarkaði í mars sem hafði áhrif á fjármálamarkaði víða um heim. Fasteignalánamarkaðurinn var sérstæður að því leytinu til að lántakendur fjármálastofnana í þessum geira voru með slæmt lánshæfi og höfðu í einhverjum tilfellum lent í greiðsluerfiðleikum. Urðu fjölmargar fjármálastofnanir í Bandaríkjunum fyrir skakkaföllum vegna samdráttarins og varð að minnsta kosti einn stór aðili á markaðnum gjaldþrota. Óttast var í fyrstu að þrengingarnar myndu smita frá sér út í efnahagslífið. Það gekk hins vegar ekki eftir.

Verðlækkunin nú er almenn og greindist í þrettán stórborgum vestanhafs. Hún var þó mismikil eftir borgum, einna mest í Detroit þar sem fasteignaverð lækkaði að meðaltali um átta prósent á milli ára.

Þetta mun sömuleiðis vera fyrsta almenna verðlækkunin á bandarískum fasteignamarkaði í sextán ár, að sögn bandarísku fréttaveitunnar Bloomberg sem spáði því í vikunni að þetta, samhliða hárri verðlagningu á eldsneyti, sem er sérstaklega slæm að sumri til, gæti haft neikvæð áhrif á einkaneyslu, sem er stór liður í hagvaxtartölunum.

Greinendur segja greinilegt að botninum sé náð og gera ráð fyrir um 2,5 til 3,0 prósenta hagvexti á yfirstandandi fjórðungi.