Presley ekki lengur í eigu almennings

Gengi hlutabréfa í bandaríska fyrirtækinu CKX Inc. hækkaði um 35 prósent og fór í methæðir á fimmtudag eftir að félagið tilkynnti að það ætlaði að kaupa öll útistandandi bréf í félaginu, sem eftir viðskiptin verður rekið sem einkahlutafélag.

Roberts Sillerman, forstjóri fyrirtækisins, og Simon Fuller, heilinn á bak við American Idol-þættina, standa á bak við kaupin, sem nema 1,3 milljörðum Bandaríkjadala, jafnvirði rúmra áttatíu milljarða íslenskra króna.

Greitt verður fyrir bréfin með reiðufé og hlutum í fasteignafélagi Sillermans, sem byggir og rekur lúxusíbúðir.

CKX Inc., sem skráð er á á Nasdaq-hlutabréfamarkaðinn í Bandaríkjunum, á Graceland, heimili bandaríska rokkgoðsins Elvis Presley í Memphis, sem og vörumerki hans. Auk hans eru nokkrir frægir einstaklingar undir hatti fyrirtækisins, svo sem David Beckham.

CKX á auk þessa hugverkaréttinn að ýmsum keppnum, svo sem að Idol-nafninu víða um heim, þar á meðal hér, og keppninni So You Think You Can Dance í gegnum félag Fullers, 19 Entertainment.