Copeinca stendur við stóru orðin

Verðmæti hlutabréfa í Cope­inca, perúska fiskimjöls- og lýsis­framleiðandum, hefur aukist um helming eftir að félagið var skráð í Kauphöllina í Osló í lok janúar. Glitnir sá um skráninguna og annaðist einnig hlutafjárútboð til fagfjárfesta þar sem um sjö milljarðar króna söfnuðust. Stjórnendur félagsins sögðu þá að fjármunirnir yrðu nýttir til að vaxa hratt á heimamarkaði.

Jón Garðar Guðmundsson, sem fer fyrir sjávarútvegsteymi Glitnis í Suður-Ameríku, segir að Copeinca hafi tekið yfir fimm fyrirtæki frá skráningu og hafi klárlega tekið forystuna í sameiningarhrinu perúskra fiskimjöls- og lýsisframleiðenda. Copeinca hefur þannig farið frá því að vera fjórða stærsta fyrirtækið í það að vera það annað stærsta. Bankinn hefur tekið þátt í fjármögnun vegna uppkaupa félagsins. „Þeir eru með mjög skýra framtíðarsýn og hæfa stjórnendur,“ segir Jón Garðar.

Eftir síðustu kaup, á Empresa Pesquera San Fermin, ræður Copeinca um 10,5 prósentum af allri afkastagetu fiskimjölsverksmiðja í Perú. Copeinca er metið á um 27 milljarða króna.

Íslenskir fjárfestar voru áberandi í hlutahafahópi Copeinca við skráninguna. FL Group var þriðji stærsti hluthafinn og þá voru Glitnir og Samherji/Síldarvinnslan meðal stærstu hluthafa.