Yfirtakan á Invik í höfn

Ekkert kemur nú í veg fyrir að yfirtaka Milestone, félags bræðranna Karls og Steingríms Wernerssona, á sænska fjármálafyrirtækinu Invik gangi eftir. Í gær hafði Racon Holdings, dótturfélag Milestone, tryggt sér um 98 prósent hlutafjár í Invik og 99 prósent atkvæðisréttar þegar tilboðsfrestur rann út.

Þá hafa fjármálayfirvöld í Hollandi veitt blessun sína fyrir kaupunum en áður höfðu yfirvöld í Lúxemborg og Svíþjóð gefið grænt ljós.

Nokkrir stórir fjárfestingasjóðir og lífeyrissjóðir, sem höfðu mótmælt því að hærra verð var greitt fyrir A-hlutabréf en B-hlutabréf, létu af andstöðu sinni og gengu að tilboðinu. Racon getur nú innleyst útistandandi hluti í Invik og eignast það að fullu.