Detroit - Chicago í beinni í kvöld

Leikur Detroit Pistons og Chicago Bulls verður sýndur beint á sjónvarpsstöðinni Sýn á miðnætti í kvöld. Liðin eru almennt talin tvö af þeim bestu í Austurdeildinni í NBA en staða þeirra er þó afar ólík eftir fyrsta mánuðinn í deildarkeppninni.

Detroit hefur spilað mjög vel og unnið 13 leiki og tapað aðeins 5, en Chicago er í stökustu vandræðum og hefur aðeins unnið 5 af 16 leikjum sínum til þessa. Detroit hefur aðeins tapað einum leik á heimavelli og því er ljóst að Chicago á erfitt verkefni fyrir höndum í kvöld.