Þýskar væntingar skutu yfir markið

Heimsmeistarakeppnin í knattspyrnu í Þýskalandi í fyrra stóð ekki undir þeim væntingum sem Þjóðverjar gerðu til hennar. Vöxtur landsframleiðslu var minni en vonir stóðu til auk þess sem velta einskorðaðist við þann geira sem tengdist keppninni.

Þannig jókst sala á bjór minna en gert hafði verið ráð fyrir vegna samdráttar á innanlandsmarkaði. Veðursæld síðasta sumar og heimsmeistarakeppnin í knattspyrnu, sem haldin var í júní og júlí, eru undantekningar frá árinu í heild og varð til þess að sala á bjór jókst um allt að 2,7 prósent. Heimsmeistarakeppninni er hins vegar ekki að þakka alla aukninguna heldur meiri útflutningi á miðinum gyllta en fyrri ár.

Væntingavísitölur ruku upp úr öllu valdi og höfðu ekki mælst hærri í fimm ár áður en blásið var til leika í fyrra enda reiknað með að landsframleiðsla ykist um allt að hálft prósent. Nýir hagvísar benda hins vegar til að uppgangurinn hafi einskorðast við þá tvo mánuði sem heimsmeistarakeppnin stóð. Hafi áhugamenn um fótbolta einokað hótel landsins og hinn almenni ferðamaður því lagt leið sína annað á tímabilinu. Velta jókst því minna en vonir stóðu til.

Öðru máli gegnir hins vegar um þann geira sem tengdist boltanum með beinum hætti en bráðabirgðatölur benda til að velta hjá framleiðendum íþróttafatnaðar hafi aukist um allt að 70 prósent á milli ára á tímabilinu sem keppnin stóð yfir.