Dagurinn er bjartur

Sjötti þingmaður Suðvesturkjördæmis, Ögmundur Jónasson, ræðir um Fagra Ísland stefnu Samfylkingarinnar í umhverfismálum í Fréttablaðinu 26. júní sl. Síðan er skipt um gír og þingmaðurinn segir orðrétt: „Samkvæmt staðhæfingum forstjóra Alcans, Michel Jacques, hafði bæjarstjórinn frumkvæði að því að bjóða Alcan að stækka álverið í Straumsvík með því að byggja á landfyllingu.“

Með tilliti til þessa ber að upplýsa þingmanninn að það hefur legið fyrir lengi að hafnarstjórn sé að skoða þróun á hafnarstæðinu við Straumsvík, með landfyllingum út frá lóð álversins, eins og kemur fram í staðfestu aðalskipulagi. Hafnarfjarðarhöfn vinnur nú að frekari útfærslu á fyllingum fyrir mögulegt framtíðarhafnarsvæði, sem yrði þá valkostur á móti þeim tillögum sem kynntar hafa verið um hafnarstæði út frá landi Óttarstaða vestan við víkina.

Fjölmörg fyrirtæki leita eftir því að komast á hafnarsvæði í Hafnarfirði þar sem önnur stærsta höfnin á höfuðborgarsvæðinu er og gert ráð fyrir samkvæmt staðfestu svæðaskipulagi höfuðborgarsvæðisins. Þeir sem fylgst hafa með, hefur verið fullkunnugt um þessar hugmyndir Hafnarfjarðarhafnar um langt árabil. Umræðan, um tillögur að stækkun Straumsvíkurhafnar eða nýja höfn á vesturbakkanum, er því ekki ný af nálinni.

Vel má vera að forstjóri Alcan Metal Group líkt eins og fjölmargir aðrir hér á landi, jafnvel einstaka þingmenn kjördæmisins, séu ekki vel að sér varðandi skipulagsmál í Hafnarfirði og hafi því ekki heyrt af þessum landfyllingaráformum m.t.t. þróunar hafnarmannvirkja.

Þrátt fyrir að deiliskipulagið sem kosið var um 31. mars sl. hafi ekki verið auglýst skv. skipulags- og byggingarlögum, enda niðurstaða í lýðræðislegri íbúakosningu ljós, þá mun skipulagsumræða halda áfram í Hafnarfirði. Þar hafa allir sinn rétt, íbúar sem fyrirtæki. Í Hafnarfirði hefur á undanförnum mánuðum verið úthlutað hundruðum lóða til iðnaðar- og þjónustufyrirtækja. Það mun gerast áfram, á landfyllingum (ef af þeim verður) svo og á öðrum svæðum ofar í landi. Það mun gerast algjörlega óháð því hvað kanadískir forstjórar tjá sig um, enda umræddar hugmyndir ekki nýjar af nálinni eins og 6. þingmaður Suðvesturkjördæmis heldur.

Samfylkingarfólk er aldrei hrætt við umræðu um umhverfismál, skipulagsmál hvað þá heldur lýðræðismál.

Höfundur er bæjarfulltrúi í Hafnarfirði og þingmaður Suðvesturkjördæmis.