Andstæðir kraftar togast á

Krónan styrktist um 1,48 prósent í gær og stendur gengisvísitalan í 117,6 stigum. Talsverðar sveiflur hafa verið á krónunni undanfarnar vikur og hefur gengi hennar veikst um 6,4 prósent síðan 24. júlí síðastliðinn. Velta á gjaldeyrismarkaði nam 23 milljörðum króna í gær.

Fram kemur í Morgunkorni Glitnis að áhættufælni á alþjóðamörkuðum hafi myndað þrýsting til veikingar krónunni undanfarna daga, en á móti komi að mikill vaxtamunur þrýsti gengi krónu upp á við. Þessir andstæðu kraftar hafi togast á og valdið miklum sveiflum.

Hinn hollenski Radobank gaf á dögunum út krónubréf fyrir 25 milljarða króna. Glitnir telur ólíklegt að útgáfan hafi mikil áhrif á gengi krónunnar, þar sem bréfin verði að mestu leyti í eigu innlendra aðila.

Þrátt fyrir veikingu undanfarinna tveggja vikna er krónan enn níu prósentum sterkari en um áramótin. Greiningardeild Landsbankans segir í Vegvísi að veiking krónunnar sé að öllum líkindum tímabundin, hún muni haldast sterk enn um sinn.