Láta til sína taka á evrópskum bankamarkaði

FL hefur eignast þriggja prósenta hlut í öðrum stærsta banka Þýskalands, Commerzbank. Þetta er hlutur sem metinn er á rúma 63 milljarða króna. Bankinn er að mati Hannesar á góðu verði sem endurspeglar ekki þann viðsnúning sem hefur orðið á rekstri bankans heima fyrir og erlendis. Í fyrra hagnaðist þýski bankinn um 140 milljarða króna.

„Okkur finnst evrópski bankageirinn í heild spennandi og teljum að ýmislegt eigi eftir að gerast hvað varðar samruna og yfirtökur á næstu misserum.“ Forsvarsmenn FL líta á kaupin í Commerzbank sem spennandi kosti án þess að næstu skref hafi þar verið ákveðin, en segja þó að fleiri fjárfestingar í fjármálageiranum séu til skoðunar.

Commerzbank er önnur stærsta eignin í eignasafni FL á eftir tæplega þriðjungshlut í Glitni.

FL Group skilaði 15,1 milljarðs hagnaði á fyrsta ársfjórðungi en greiningardeildir Glitnis og Kaupþings höfðu reiknað með að afkoma félagsins yrði í kringum tólf milljarða króna. Góða afkomu má þakka að stórum hluta gengishagnaði af Glitnishlutnum. Hagnaður jókst um 158 prósent á milli ára.

Ársfjórðungurinn var sá fyrsti sem FL starfar sem hreint fjárfestingarfélag - án tengingar við rekstrarfélög á borð við Icelandair. Arðsemi eigin fjár var 42,4 prósent á ársgrundvelli. Fjárfestingatekjur gáfu um 15,6 milljarða króna, en rekstrargjöld námu 883 milljónum króna.

„Við áttum góðu gengi að fagna á alþjóðlegum fjármálamörkuðum og óskráðar fjárfestingar okkar ganga vel,“ segir forstjórinn Hannes Smárason og er bjartsýnn um góðan hagnað fyrir árið í heild.

Stærstu óskráðu fjárfestingar félagsins liggja annars vegar í House of Fraser og hins vegar í Refresco sem óx hratt á fjórðungnum samfara þremur yfirtökum. Hollenska félagið er nú orðið stærsti drykkjarvöruframleiðandi Evrópu. Hannes telur að nýleg fyrirtækjakaup hafi aukið mjög virði Refresco og bendir á að margfaldarar sem notaðir eru við kaup á félögum í geiranum hafi verið hækka. Velta Refresco er áætluð 1,1 milljarður evra á þessu ári og rekstrarhagnaður fyrir afskriftir (EBITDA) um 100 milljónir evra.

Efnahagsreikingur FL stóð í 303 milljörðum í lok árs og óx um 15 prósent frá ársbyrjun. Eigið fé var um 142 milljarðar og stóð í stað, enda nam arðgreiðsla fyrir síðasta ár um fimmtán milljörðum króna. Bréf í FL enduðu vikuna í 29,5 krónum á hlut og hækkuðu um 1,5 prósent í gær.