Einungis 255 þúsund skiluðu sér

Alls hafa verið innleystar 255 þúsund krónur í tíu, fimmtíu og hundrað króna seðlum í bönkum og sparisjóðum landsins. Seðlarnir voru innkallaðir með reglugerð Seðlabankans frá árinu 2005. Frestur til að innleysa seðlana í bönkum og sparisjóðum rann út 1. júní síðastliðinn en hægt verður að framvísa þeim í Seðlabankanum í minnst eitt ár til viðbótar. Enn eru því 118,3 milljónir króna í umferð af þessum seðlum, þar af langmest af gömlu hundrað króna seðlunum, eða um 95,4 milljónir króna.

Tryggvi Pálsson, framkvæmdastjóri fjármálasviðs Seðlabankans, segir bankann í meginatriðum hafa unnið að tveimur verkefnum undanfarin ár. Öryggi þeirra seðla sem eftir standa; fimm hundruð krónur, þúsund, tvö þúsund og fimm þúsund krónur, hafi verið aukið. Þá hafi farið fram nokkurs konar tiltekt þar sem aurar hafi verið lagðir niður sem lögeyrir, og bankinn byrjað að greiða heildarfjárhæðir með heilum krónum.

„Seðlarnir eru mun fullkomnari en áður var og öryggisþættirnir eru traustari en áður. Sú vinna var nauðsynleg þar sem því miður koma alltaf upp dæmi um falsanir annað slagið. Síðan erum við búin að hreinsa burt aurana, sem ekki voru í notkun."

Alls eru nú í umferð tæplega 13,3 milljarðar króna í peningaseðlum og andvirði tæplega tveggja milljóna af mynt, eða rúmlega fimmtíu þúsund krónur á mann sé miðað við að Íslendingar séu þrjú hundruð þúsund. Seðlar og mynt í umferð eru um eitt prósent landsframleiðslu hér á landi „Mikið af þessum seðlum er í vörslu banka, sparisjóða og hjá verslun og þjónustu. Obbinn af veltunni í landinu er vegna kortaviðskipta en seðlarnir eru alltaf nokkuð stöðugt hlutfall af landsframleiðslu," segir Tryggvi Pálsson.