Blockbuster velur Blu-ray

Bandaríska myndbandaleigukeðjan Blockbuster ætlar að einbeita sér að kaupum og útleigu á DVD-myndum á Blu-ray formi. Ákvörðunin þykir nokkuð áfall fyrir Toshiba og önnur fyrirtæki, sem hafa lagt allt sitt á að HD-DVD-staðallinn verði ráðandi í nýrri kynslóð háskerpumynddiska.

Stjórnendur Blockbuster segja ákvörðunina hafa verið tekna eftir að flestir viðskiptavina keðjunnar hafi valið myndir á Blu-ray staðli fram yfir HD-DVD-staðalinn í 250 myndbandaleigum af þeim 1.450 sem Blockbuster rekur í Bandaríkjunum þar sem myndir á báðum stöðlum voru til boða. Þá mun hafa ráðið nokkru að meira myndefni hefur verið gefið út á Blu-ray formi en HD-DVD staðli.

Matthew Smith, einn yfirmanna Blockbusterkeðjunnar, segir í samtali við fréttastofu Associated Press, að viðskiptavinir hennar hafi sent klár skilaboð. „Við getum ekki lokað augunum fyrir þessu,“ segir hann og bætti við að enn sem komið væri hafi flest fyrirtæki í afþreyingaiðnaði í Bandaríkjunum ákveðið að fara í lið með Sony og Blu-ray-staðlinum.