Sverja af sér samráð við keppinaut JJB

Exista og Chris Ronnie, sem stóðu að kaupum á 29 prósenta hlut í íþróttavöruverslanakeðjunni JJB Sports um þarsíðustu helgi, neita því alfarið að Mike Ashley sem fer fyrir Sports Direct, helsta keppinaut JJB, komi nálægt þessum kaupum.

Þetta kemur fram í Observer sem bendir á að fjárfestahópurinn, sem kallast Hallco 1480 ltd., hafi tengsl við Ashley. Exista er stærsti hluthafinn í Kaupþingi sem var Ashley innan handar við yfirtöku á enska Úrvalsdeildarliðinu Newcastle Utd. á dögunum.

Ronnie hefur unnið fyrir Ashley og verður brátt undirmaður Tom Knight, forstjóra JJB. Sá græddi ágætlega á yfirtöku Ashleys á Newcastle Utd. þegar hann seldi 0,75 prósenta hlut.

Exista fór að mörgu leyti ótroðnar slóðir með þessum kaupum, enda hefur félagið ekki fjárfest með þessum hætti í smásölugeiranum. Gengi bréfa í JJB Sports hafði í gærmorgun hækkað um rúm fimm prósent frá kaupunum. Það er þó undir því verði sem Ronnie og Exista greiddu, enda var greitt yfirverð fyrir ráðandi hlut.

Hlutabréf í Sports Direct hafa hins vegar fallið um þrjátíu prósent eftir að félagið var skráð á hlutabréfamarkað í febrúar síðast liðnum.