EMI-útgáfan samþykkir yfirtökuboð

Stjórn bresku tónlistarútgáfunnar EMI samþykki á mánudag að taka yfirtökutilboði fjárfestingasjóðsins Terra Firma. Tilboðið hljóðar upp á 265 pens á hlut, eða 2,4 milljarða punda, jafnvirði 298 milljarða íslenskra króna. Gengi bréfa í félaginu rauk upp um 23 pens í kjölfarið og endaði í 271 pensi á hlut við lokun markaða.

Það mun vera vísbending um að einhverjir hluthafa hafi reiknað með öðru og hærra boði í félagið.EMI hefur átt við rekstrarvanda að stríða vegna minnkandi tekna og skilaði tapi upp á 260 milljónir punda, jafnvirði rúmra 32 milljarða íslenskra króna, á síðasta ári. Þá stefnir ekki í gott ár hjá fyrirtækinu en það hefur gefið út tvær neikvæðar afkomuviðvaranir á þessu ári.

Stjórnendur tónlistarútgáfunnar ákváðu að setja EMI í söluferli fyrr á árinu og opnuðu bækurnar fyrir hugsanlegum kaupendum í síðustu viku.

Nokkrir fjárfestingasjóðir og bandaríski útgáfurisinn Warner Music glugguðu í bækur EMI en gerðu ekki tilboð.

Tilboð Terra Firma kemur nokkuð á óvart enda hefur félagið ekki fjárfest í tónlistar- og afþreyingaiðnaði. Fréttaveitan Bloomberg hefur hins vegar eftir heimildamönnum sem tengjast Guy Hands, forstjóra félagsins, að hann hafi skoðað tónlistar­útgáfuna síðastliðin tvö ár og látið vaða þegar færi gafst.