Sól kaupir Emmessís

Gengið hefur verið frá samkomulagi milli Auðhumlu svf., móðurfélags Mjólkursamsölunnar og Sólar ehf. um kaup þess síðarnefnda á Emmessís hf. Fram kemur í tilkynningu að samkomulag hafi verið undirritað með fyrirvara um áreiðanleikakönnun. Kaupverð er sagt trúnaðarmál.

Snorri Sigurðsson, framkvæmdastjóri Sólar, fagnar kaupunum á Emmessís, einu þekktasta vörumerki landsins. „Vörurnar eru framleiddar úr hreinum, íslenskum landbúnaðarafurðum sem eiga góða samleið með þeirri vöru sem Sól framleiðir í dag,“ er eftir honum haft. Rekstur ísgerðarinnar verður áfram að Bitruhálsi 1, en stefnt er að sameiningu félaganna í lok ársins. Fyrirtækjaráðgjöf SPRON sá um sölu félagsins og verðbréfafyrirtækið Arev fjármagnaði kaupin.