Pippen fetar í fótspor Loga

Körfuknattleiksmaðurinn Scottie Pippen hefur náð samkomulagi við fyrrum félaga Loga Gunnarssonar í ToPo í Finnlandi og mun spila tvo leiki með liðinu í vetur.

Pippen varð á sínum tíma sexfaldur NBA meistari með Chicago Bulls og var nálægt því að snúa aftur á síðustu leiktíð. Pippen er 41 árs gamall en fyrrum félagi hans hjá Chicago, Dennis Rodman, spilaði á sínum tíma einn leik með liðinu.

"Við erum enn að ganga frá smáatriðum og því hvað hann spilar marga leiki. Hann verður besti leikmaðurinn sem spilað hefur í Evrópu," sagði framkvæmdastjóri ToPo í Helsinki. Hann sagði að Pippen fengi ekki hærri upphæð en sex stafa tölu í evrum talið fyrir samning sinn við félagið.