Nýtt neyðarkerfi bætir viðbragðstíma

Nýtt neyðarfjarskiptakerfi var tekið í notkun í Björgunarmiðstöðinni í Skógarhlíð í gær. Með því geta allir sem koma að almannavörnum haft samskipti í einu fjarskiptakerfi, nánast hvar sem er á landinu.

Kerfið byggir á TETRA-fjarskiptakerfinu sem hefur verið notað hér á landi af lögreglu og öðrum björgunaraðilum síðan um aldamótin. Settir hafa verið upp um áttatíu sendar víðs vegar um landið en þeir verða alls 150 þegar kerfið verður fullbúið á næsta ári.

Við kynninguna í gær var sett á svið björgun þar sem maður hringdi í Neyðarlínuna og kvaðst vera í vanda staddur á Lyngdalsheiði. Lögreglu- og sjúkrabílar voru sendir á staðinn og mátti sjá nákvæmlega hvar þeir voru á á korti, enda er staðsetningartæki í hverjum síma. Starfsmaður björgunarmiðstöðvarinnar fylgdist með ferðum allra sem tóku þátt í leitinni þar til maðurinn fannst.

Verkefnið hófst í lok september á seinasta ári þegar tekin var ákvörðun um að efla innlendan viðbúnað. Síðan þá hefur verið samið við Landsbjörgu um að björgunarsveitir landsins noti kerfið. Orkufyrirtækin, Flugmálastjórn og fleiri opinberir þjónustuaðilar munu einnig geta notað kerfið þegar þörf krefur.

Björn Bjarnason dómsmálaráðherra, sem var við kynningu kerfisins í gær, segir það hafa fyrst og fremst í för með sér stórbætta viðbragðsgetu. Allir sem koma að málinu geti nú unnið saman í einu kerfi um allt landið.

„Í björgunarstörfum eru leitar- og fjarskiptakerfi mjög mikilvægur þáttur svo hægt sé að kalla út og stjórna þeim mannskap sem þarf. Með þessu kerfi verður öryggi og öll þjónusta stóraukin.“

Hann segir Ísland eitt fyrsta landið í heiminum sem tekur í notkun eitt neyðarfjarskiptakerfi fyrir allt landið. „Allar þjóðir stefna að því að taka upp svona kerfi en vegna stjórnkerfa og stærðar hefur engum tekist að samhæfa neyðarsamskipti yfir allt landið nema okkur.“

Aðspurður segir Björn kostnaðinn við verkefnið vera nokkur hundruð milljónir króna.