Högnuðust yfir 47 milljarða

Samanlagður hagnaður viðskiptabankanna þriggja, Glitnis, Kaupþings og Landsbankans, og Straums-Burðaráss Fjárfestingabanka nam samanlagt 47,1 milljarði króna á fyrsta ársfjórðungi. Þetta er nokkuð lægri heildartala en á sama ársfjórðungi í fyrra en þá var hagnaður bankanna fjögurra alls um 60,5 milljarðar króna.

Gengishagnaður var óvenjumikill á fyrsta fjórðungi 2006 sem skýrir að hluta til þessa afkomulækkun.

Afkoma Glitnis, Landsbankans og Straums-Burðaráss dróst saman en lítils háttar hagnaðaraukning varð hjá Kaupþingi sem hagnaðist mest, um 20,3 milljarðar króna. Arðsemi eigin fjár á ársgrundvelli var á breiðu bili, frá 4,6 prósentum til 45,2 prósenta.

Heildareignir bankanna í lok mars voru komnar yfir 9.200 milljarða króna sem svara til áttfaldrar landsframleiðslu síðasta árs. Eigið fé baænkanna stóð í 750 milljörðum króna.

Hvorki fjármálaþjónustufyrirtækið Exista, sem hagnaðist um 57,2 milljarða, né fjárfestingarfélagið FL Group, sem var með 15,1 milljarðs króna hagnað, eru tekin með með í þessum tölum. Það vekur athygli að Exista hagnaðist meira en sem nemur heildarhagnaði bankanna fjögurra.