Fást við mestu verðbólgu heims

Vísitala neysluverðs jókst um 500 prósent á milli mánaða í Afríkuríkinu Simbabve í mars og jafngildir það að verðbólga mælist 2.200 prósent. Þetta er sögulegt heimsmet enda hafa hvergi í veröldinni sést jafn háar verðbólgutölur.

Þetta er langtum meiri verðbólga en búist var við enda hafði verið gert ráð fyrir að hún myndi liggja nær 2.000 prósentunum. Þótti mönnum þó nóg um.

Sérfræðingar í efnahagsmálum segja að ástandið eigi eftir að hríðversna og geti menn átt von á að sjá allt að 5.000 prósenta verðbólgu fyrir árslok grípi stjórnvöld ekki í taumana.

Niðurstaðan þykir mikill skellur fyrir stjórnvöld í Simbabve, sem reyndu í lengstu lög að fresta birtingu þeirra á meðan haldið var upp á að 27 ár eru liðin síðan landið fékk sjálfstæði frá Bretum.

Efnahagur Afríkuríkisins hefur hríðversnað ár frá ári og þykir í molum. Mikill meirihluti landsmanna, sem eru 13 milljónir talsins, eða 80 prósent, er undir fátæktarmörkum og reyna þeir sem fá pening í hendur að eyða þeim eins fljótt og auðið er til að koma í veg fyrir að þeir brenni upp í verðbólgubáli.