BTC í Búlgaríu selt á 160 milljarða króna

Gengið hefur verið frá sölu á búlgarska símafélaginu BTC til bandaríska fjármála-fyrirtækisins AIG Global Investment Group fyrir 160 milljarða króna. Skrifað var undir sölusamning í gærkvöldi, en stærsti eigandi BTC var Novator, fjárfestingafélag Björgólfs Thors Björgólfssonar, með um 85 prósenta eignarhlut.

Í tilkynningu Novator kemur fram að um sé að ræða stærstu skuldsettu yfirtöku í Mið- og Austur-Evrópu til þessa. „Markaðsvirði félagsins er um 145 milljarðar króna. AIG hefur tryggt sér kaup á rúmlega 90 prósentum í félaginu en stefnir að kaupum á öllu félaginu og afskráningu úr Kauphöllinni í Sófíu," segir þar.

Novator fjárfesti fyrst í BTC í samvinnu við fjárfestingafélagið Advent International, EBRD, National Bank of Greece, og fleiri þegar félagið var einkavætt í júní 2004. Félögin Straumur, Burðarás og Síminn sem þá var í ríkiseigu tóku einnig þátt í upphaflegu viðskiptunum, en þá voru keypt 65 prósent í félaginu. Síðan hefur Novator aukið við hlut sinn og fer við söluna nú með um 85 prósenta hlut í BTC. „Ávöxtun íslensku fjárfestanna sem tóku þátt í fyrstu viðskiptunum fyrir rúmlega tveimur og hálfu ári er nærri fimmföld. Hagnaður Novator af viðskiptunum er um 55 til 60 milljarðar króna en annarra íslenskra fjárfesta um 6 milljarðar króna," segir í tilkynningunni.

Frá einkavæðingu hefur BTC tekið miklum breytingum og vaxið samhliða gagngerum endurbótum á tæknibúnaði og margþættum skipulagsbreytingum. Þannig segir í tilkynningu Novator að starfsmönnum hafi verið fækkað úr um 24 þúsundum í 10 þúsund í samráði við stjórnvöld og verkalýðsfélög. Þá hafi verið fjárfest í nýjum tækjabúnaði fyrir nærri 40 milljarða króna og rekstur farsímaþjónustu hafinn. BTC býður nú alhliða fjarskiptaþjónustu og má til marks um vöxt félagsins nefna tæplega 17 prósenta aukningu hagnaðar eftir skatta og afskriftir milli áranna 2006 og 2005, úr rúmlega 113 milljónum búlgarskra leva í 132 milljónir leva, eða úr sem nemur 5,03 milljörðum króna í 5,9 milljarða króna.

Kaupandi BTC, bandaríska félagið AIG, býður alhliða fjármálaþjónustu um heim allan, þar á meðal í tryggingum, fjárfestingum, eignastýringu og fasteignum.

Fyrirtækið stýrir nærri 55 þúsund milljörðum króna og hefur um 2.000 starfsmenn sem starfa á 44 skrifstofum víða um heim.