Vanræksla Samfylkingarinnar

Samfylkingin reynir enn að fría sig ábyrgð á skorti á hjúkrunarrýmum í Reykjavík. Það gerði m.a. Steinunn V. Óskarsdóttir, frambjóðandi flokksins hér í Fréttablaðinu síðasta laugardag, 21. apríl. Staðreyndirnar tala hins vegar sínu máli.

Eina hjúkrunarheimilið sem ákvörðun var tekin um og byggt var í Reykjavík í 12 ára stjórnartíð R-listans var hjúkrunarheimilið Sóltún, sem var byggt í einkaframkvæmd og var alfarið á vegum ríkisins.

Nokkur hjúkrunarheimili voru byggð eftir 1980 í tíð sjálfstæðismanna við stjórn Reykjavíkurborgar. Þetta eru hjúkrunarheimilin Droplaugarstaðir sem var opnað 1981, Seljahlíð 1986, Skjól, sem var byggt 1985-1988, Eir, byggt á árunum 1990-1995 og Skógarbær sem var byggt á árunum 1996-1997, en ákvörðun um byggingu þess var tekin í tíð sjálfstæðismanna.

Reykjavíkurborg kostaði að fullu byggingu Droplaugarstaða og 65% af byggingu Seljahlíðar, en 35% komu úr framkvæmdasjóði aldraðra. Borgin greiddi að auki 30% af byggingarkostnaði Skógarbæjar. Skv. lögum á borgin í raun aðeins að leggja til 15% byggingarkostnaðar, en sjálfstæðismeirihlutinn í Reykjavík lagði meira til, til að mæta brýnni þörf aldraðra borgarbúa. Í tíð R-listans var látið reka á reiðanum, m.a. með þeim afleiðingum sem við sjáum í dag. Á þriðja hundrað aldraðra Reykvíkinga á biðlista eftir hjúkrunarrýmum í Reykjavík.

Samkomulag sem undirritað var milli borgarstjóra og heilbrigðisráðherra rétt fyrir sveitarstjórnarkosningar 2002 strandaði ekki síst á töfum í skipulagsvinnu Reykjavíkurborgar. Það er auðvelt að skella skuldinni á ríkið, en verkin tala sínu máli og í tíð R-listans voru málefni aldraðra svo sannarlega látin sitja á hakanum. Má í því sambandi benda á að nánast algjör stöðnun var í uppbyggingu þjónustuíbúða, félags- og þjónustumiðstöðva og leiguíbúða fyrir eldri borgara í Reykjavík í tíð R-listans.

Ný sókn í þessum málum er hafin með nýjum meirihluta sjálfstæðismanna í Reykjavík, en bygging hjúkrunarheimila, leiguíbúða, þjónustuíbúða og almennra íbúða í þjónustukjörnum er á teikniborðinu, auk tveggja nýrra þjónustumiðstöðva.

Já, staðreyndirnar tala sínu máli og undan þeim getur sviðið.

Höfundur er alþingismaður.