Actavis með á endasprettinum

Mestar líkur eru á að lyfjafyrirtækin Actavis og indverska félagið Torrent Pharmaceuticals berjist á endanum um kaup á samheitalyfjahluta þýska lyfjarisans Merck. Þetta segir bandaríska viðskiptatímaritið Forbes í gær sem telur að kaupverð geti numið allt að sex milljörðum dala, jafnvirði rúmra 392 milljarða íslenskra króna.

Fjárhæðir á borð við 360 til 450 milljarða króna hafa áður verið nefndar sem hugsanlegur verðmiði fyrir samheitalyfjahlutann.

Forbes segir verðið geta reynst of stór biti fyrir aðra mótbjóðendur, sem þó hafi stóra fjárfestingasjóði á bak við sig.