Íbúakosning í Hafnarfirði

Atkvæðagreiðsla íbúa í Hafnafirði í dag um fyrirhugaða stækkun Álversins í Straumsvík er mikilvægur prófsteinn á þróun íbúalýðræðis. Við erum saman að stíga mikilvægt skref og það er fagnaðarefni hversu almenn og víðtæk umræða og þátttaka bæjarbúa hefur verið á síðustu vikum.

Virk þátttaka og opin og almenn skoðanaskipti eru grundvöllur lýðræðislegrar afgreiðslu. Íbúar í Hafnarfirði njóta þeirrar sérstöðu umfram aðra landsmenn að hafa rétt og stöðu til þess að fá að greiða atkvæði um þýðingarmikil mál eins og stækkun Álversins í Straumsvík. Þann rétt eigum við að nýta okkur til fullnustu.

Hver sem niðurstaðan verður í kosningunum, þá er ljóst að sigurvegarar þeirra verða íbúar Hafnarfjarðar. Góð þátttaka í kosningunum eru skýr skilaboð frá íbúum um að þeir láta sig verulega skipta þróun og framtíð byggðarinnar og atvinnulífsins hér í Firðinum.

Ég hef með skýrum hætti í aðdraganda kosninganna lagt ríka áherslu á ábyrga og upplýsta umræðu og að bæjarbúar fái rétta og raunsanna mynd af þeim atriðum sem máli skipta. Hafnarfjarðarbær hefur með margvíslegum hætti upplýst bæjarbúa um allar forsendur málsins á hlutlausan og ábyrgan hátt. Leitast hefur verið við að hafa gott samráð um kynningarferlið milli bæjaryfirvalda og hagsmunaðila. Fyrirtækið Capacent hefur ásamt starfsmönnum bæjarfélagsins lagt sig fram í þeim efnum. Ástæða er til að þakka öllum þeim sem hafa lagt sitt af mörkum til að skapa bæði breiða og líflega umræðu í bæjarfélaginu.

Við höfum sýnt og sannað að íbúalýðræði er meira en nafnið tómt. Öll umræða síðustu vikur ber þess merki að það er ekki af ástæðulausu sem við höfum sameinast um þá ákvörðun að kveða uppúr með framhald þessa máls í almennri kosningu. Á sama hátt og bæjarstjórn hefur lýst yfir þá skulum við bæjarbúar allir vera samstilltir og sameinaðir í því að virða þá niðurstöðu sem mun liggja fyrir að kosningum loknum.

Höfundur er bæjarstjóri í Hafnarfirði.