Horft framhjá lækkandi vaxtamun í þjóðfélagsumræðunni

Guðmundur Hauksson, sparisjóðsstjóri SPRON, sagði á aðalfundi sparisjóðsins sem haldinn var í gær, að vaxtamunur sparisjóðsins hefði verið 1,6 prósent á síðasta ári samanborið við 2,4 prósent árið 2005. Vaxtamunur hafi verið enn meiri þegar litið er lengra aftur í tímann. „Þetta eru staðreyndir málsins. Vaxtamunur á Íslandi hefur farið lækkandi undanfarin ár og það er með ólíkindum að öðru skuli blákalt haldið fram í þjóðfélagsumræðunni.“

Þá minntist Guðmundur á að rekstrartekjur, til dæmis af hlutabréfum, hefðu vaxið hratt hjá SPRON og skipti nú sköpum hvað afkomu sjóðsins snerti. Rekstrartekjur SPRON af hlutabréfum námu 11,8 milljörðum króna í fyrra en hagnaður eftir skatta rúmum níu milljörðum króna.

„Í þessu sambandi er nauðsynlegt að hafa í huga að fjárfestingar okkar í hlutabréfum nema um 30 milljörðum í lok síðasta árs og að þær skila ekki vaxtatekjum. Ef við seldum þessi hlutabréf og settum andvirði þeirra inn á reikning í Seðlabanka fengjum við liðlega fjóra milljarða í vaxtatekjur á ári miðað við núverandi vaxtastig.“

Í ræðu Hildar Petersen, stjórnarformanns SPRON, kom fram að áhugi fjárfesta á stofnfjárbréfum hefur stóraukist. Stofnfjáreigendum fjölgaði um 45 prósent í fyrra og voru 1.191 í árslok.

„Gengi stofnfjárbréfa hefur líka verið fjárfestum mjög hagfellt því það vill svo til að það hefur endurspeglað arðsemi SPRON og hækkaði um 57 prósent á síðasta ári, sem er langt umfram 16 prósenta hækkun Úrvalsvísitölunnar í Kauphöllinni. Það gagnkvæma traust sem ríkt hefur milli stofnfjáreigenda og stjórnenda SPRON hefur verið lykillinn að þeim ævintýralega vexti og arðsemi sem síðastliðin tvö ár hafa skilað hjá SPRON,“ sagði Hildur.