Afritunarvörn háskerpudiska rofin

Afritunarvörn á nýju HD DVD-háskerpudiskunum hefur verið rofin. Þetta segir staðlanefnd stuðla að því að tryggja varnir sem þessar svo ekki verði hægt að afrita mynddiska að vild.

Nefndin segist hafa heimildir fyrir því að tölvuþrjótur nokkur hafi undir lok síðasta árs náð að rjúfa vörnina á nokkrum háskerpudiskum, sem nýkomnir eru á markað. Þetta mun vera í fyrsta sinn sem fréttist af slíku.

Nefndin segir engu að síður allt í stakasta lagi. Diskarnir séu ekki margir auk þess sem efni þeirra taki mikið geymslupláss. Því séu litlar líkur á að meðal­jóninn taki upp á því að afrita efni diskanna í miklu magni.

Þrjóturinn sem braut vörnina kallar sig musliz64 í netheimum. Í samtali við netmiðilinn Slyck segir hann óánægju með að sjónvarp hans hafi ekki viljað sýna myndir á HD DVD-diskunum vera einu ástæðuna fyrir því að hann hafi ákveðið að brjóta vörn disksins. „Ég er bara óánægður viðskiptavinur,“ sagði hann og benti á að hluti af vörn afþreyingarfyrirtækjanna væri að gera diskana þannig úr garði gerða að þeir virki einungis í þeim sjónvörpum og diskaspilurum sem hafi HDMI eða DVI-tengi.

„Ég verð brjálaður ef ég get ekki spilað þá diska sem ég hef keypt mér bara vegna þess að einhverjir forstjórar í Hollywood ákváðu að hafa þetta svona,“ sagði hann.